இத்தாலிய வீதியில் வார்னிங் கொடுக்காமல் ஓடிய ஒட்டகச் சிவிங்கி!

இத்தாலிய வீதியில் வார்னிங் கொடுக்காமல் ஓடிய ஒட்டகச் சிவிங்கி!

போலீஸ்காரர்களை 3 மணி நேரம் இங்கும் அங்குமாக ஓடவிட்டு தண்ணி காட்டியிருக்கிறது, ஒட்டகச் சிவிங்கி ஒன்று. “அடாடா.. மடகஸ்கார் திரைப்படத்தில் வந்த காட்சி அல்லவா இது”, என்று நீங்கள் (அல்லது உங்கள் குழந்தைகள்) சொல்லலாம். கிட்டத்தட்ட அதே காட்சிதான். ஆனால், இது நிஜம்.

இத்தாலியின் இமோலா நகர வீதிகளில் திடீரென பிரமாண்ட உயரத்துடன் ஒரு ஒட்டகச் சிவிங்கி ஓடிவர, திகைத்துப் போன மக்கள் குய்யோ முய்யோ என்று கத்தியபடி தலைதெறிக்க ஓடவேண்டியதாகி விட்டது. அதுவும், இந்த ஒட்டகச் சிவிங்கி, வீதியில் ஓடத் தொடங்கியது, வீதிகளின் ஜன நடமாட்டம் அதிகம் இருந்த ரஷ் டயத்தின்போது!

ரினால்டோ ஈர்ஃபியோ சர்க்கஸில் இருந்து தப்பியோடி வந்திருந்தது, இந்த ஒட்டகச் சிவிங்கி.

சிக்கல் என்னவென்றால், சர்க்கஸில் சாதுவாக நிற்கும் ஒட்டகச் சிவிங்கி, வெளியே வந்தபின் எப்படி ரியாக்ட் பண்ணும் என்று யாருக்கும் தெரியவில்லை. கடிக்குமா, உதைக்குமா, அல்லது அதுபாட்டுக்கு நம்ம அமைச்சர் ஓ.பி.எஸ். போல தலையாட்டிவிட்டு போகுமா என்று தெரியாததால், ஆளாளுக்கு மிரண்டு ஓடினார்கள்.

இதோ இந்த போட்டோ செட்டில், ஒட்டகச் சிவிங்கியின் ஒன் டே அவுட்ங்கையும், கடைசியில் எப்படி அதை பிடித்து சர்க்கஸூக்கு கொண்டு போகிறார்கள் என்பதையும் பாருங்கள்.

கீழேயுள்ள போட்டோவில் ஒட்டகச் சிவிங்கி இமோலா நகர சர்க்கஸில் இருந்து வெளியே வந்து ஓடுகிறது. சர்க்கஸ் வேளில் துரத்திப் பிடித்து விடலாம் என்பதுதான் ஒரிஜினல் திட்டம்.

சரி, அப்படியே பிடித்தாலும், போட்டோவில் உள்ள வேனில் ஒ.சி.-யை எப்படி கொண்டு போக திட்டமிட்டார்களோ! அடுத்த போட்டோவுக்கு வாருங்கள்.

இந்த நபர், ஒட்டகச் சிவிங்கியை பிடிக்க சென்ற ஆள். ஒட்டகச் சிவிங்கி திரும்பி அவரைத் துரத்துகிறது.

இவர் பரவாயில்லை. தமது இரு கைகளையும் விரித்து ஒட்டகச் சிவிங்கி பிடிக்க முயற்சிக்கிறார். இவரது சைஸையும், ஒ.சி.-யின் சைஸையும் பார்த்தால், இந்த திட்டமும் ஒர்க்-அவுட் ஆகாது என்று புரிந்திருக்குமே…

ஒட்டகச் சிவிங்கி சிரம பரிகாரம் செய்கையில் நைசாக அமுக்கி விடலாம் என்பது இவரது திட்டம். ஒட்டகச் சிவிங்கியும் இவர் அருகே வரும்வரை சாதுவாக படுத்திருந்து விட்டு, அப்புறம் ஓட்டம் பிடித்தது.

ஓடிய ஒட்டகச் சிவிங்கியை பிடிக்க போலீஸ் வந்திருக்கிறது. போலீஸ்காரரை கண்டு மிரளவா போகிறது ஒட்டகச் சிவிங்கி? போலீஸ்காரர்தான் குரூப்-2 வினாத்தாள் லீக் கேஸில் ஹைதராபாத் போன நம்ம திருப்பூர் போலீஸ் போல திகைத்துப் போய் நிற்கிறார், இத்தாலிய போலீஸ்கார். இவரது அதட்டலுக்கு நிற்கவில்லை ஒட்டகச் சிவிங்கி. அது ஓடிவிட்டது.

மீண்டும் பழைய ஆட்டத்தின் இரண்டாவது ஷோ தொடங்கியது. இதோ சர்க்கஸ் வேனில் ஒட்டகச் சிவிங்கியை துரத்துகிறார்கள்.

இப்போது வீதிக்கு வந்துவிட்ட ஒட்டக சிவிங்கியை பாருங்கள். ட்ரக் டிரைவர் ஒருவர் வீதியில் ஒட்டகச் சிவிங்கி வரும் என்று எதிர்பார்த்திராத காரணத்தால், திகைத்துப்போய், ட்ரக்கை ரோட்டுக்கு குறுக்கே விட்டுவிட்டார்.

தொடங்கிவிட்டது ஒட்டகச் சிவிங்கியின் நகர்வலம். பின் தொடர்வது, போலீஸ் கார்.

இப்போது ஒரு ரவுன்ட் அடித்துவிட்டு, பார்க்கிங் லாட் ஒன்றுக்கு வந்து சேர்ந்திருக்கிறது. மிருகக்காட்சிசாலையில் இருந்து நிபுணர்களை தருவித்து விட்டார்கள். அவர்களது ஆலோசனை நடக்கிறது.

இவர்களது ஆலோசனை பற்றி கவலை ஏதும் இல்லாமல் பார்க்கிங் லாட்டுக்குள் ரவுன்ட் அடிக்கிறது ஒட்டகச் சிவிங்கி.

ஆகா.. திட்டம் ரெடி. தமிழ் சினிமாவில் விஜயகாந்த் எக்சர்சைஸ் செய்வதை மறைந்திருந்து தீவிரவாதிகள் பார்ப்பதுபோல, மறைவில் இருந்து பார்ப்பவர்கள், மிருகக்காட்சிசாலையில் இருந்து வந்த நிபுணர் குழு.

இதோ, மயக்க மருந்தை போட்டு விலங்குகளை சுடும் பிரத்தியேக துப்பாக்கியால் குறிபார்க்கிறார். மி.கா.சா. நிபுணர்.

பாதி மயக்க நிலையில் உள்ள ஒட்டகச் சிவிங்கியை இப்போது ட்ரக்கில் ஏற்ற வேண்டும். அதற்கான ஏற்பாடுகள் நடக்கின்றன.

ட்ரக்கில் ஏற்றப்படுகிறது ஒட்டகச் சிவிங்கி.

இதோ பூரண மயக்கத்துக்கு சென்றுவிட்டது ஒட்டகச் சிவிங்கி. கண்விழித்து எழும்போது, மீண்டும் சர்க்கஸ் கூண்டுக்குள் இருப்பதை காணப் போகிறது! நடந்ததெல்லாம் கனவா என்று யோசிக்குமா?

Please share this Article as much as possible, Follow us , like us on Facebook