Thursday, December 5, 2013

காற்றிலே கலந்து காணாமல் போகும்... சீனாவின் விசித்திர ‘இன்விசிபிள் மேன்’ போலின்

காற்றிலே கலந்து காணாமல் போகும்... சீனாவின் விசித்திர ‘இன்விசிபிள் மேன்’ போலின் 



இசையைக் கேட்டு காற்றில் கரைந்து போனேன்... காதலில் காணாமல் போனேன் என வசனம் பேசும் ஆசாமிகளைப் பற்றிக் கேள்விப் பட்ட்டிருப்பீர்கள். 

ஆனால், இந்த சீனாக்காரர் உண்மையிலேயே காற்றில் கலந்து கண்களுக்கு மறைந்து விடுகிறார். அதற்காக இவர் ஏதோ பெரிய மாயாஜால மந்திரவாதி எனத் தப்புக் கணக்குப் போட்டு விடாதீர்கள். 

விசிட்டிங் புரொபசராக பணியாற்றி வரும் இவரது வித்தைகளை நீங்களும் கொஞ்சம் பாருங்களேன்.... 

கலை வல்லுநர்.... 

சீனாவின் சாண்டாங் மாகாணத்தைச் சேர்ந்தவர் லு போலின். ஃபைன் ஆர்ட்ஸ் முதுகலை முடித்துள்ளார்.

மறைந்து போகும் கலை.... 

கலைத்துறையில் ஆர்வம் மிக்க போலின் கண்டறிந்தது தான் ‘ மறைந்து போகும் கலை'. கலையோடு ஐக்கியமாகி இவரின் கைவண்ணம் மிளிர்கிறது.

இன்விசிபிள் மேன்.... 

உலகத்தின் ஆறு முன்னணி பல்கலைக்கழகங்கள் இவரை தங்களது விசிட்டிங் புரொபசராக பணிக்கு வைத்துள்ளன. மக்கள் இவரை செல்லமாக ‘இன்விசிபிள் மேன்' என்றே அழைக்கிறார்கள்.

நகரத்துக்குள் மறைந்து போதல்.... '

நகரத்துக்குள் மறைந்து போதல்' என்கிற தலைப்பில் சீனா முழுவதும் சென்று மக்கள் பெரும்பாலும் பயன்படுத்தும் இடத்தில் அந்த இடத்தில் உள்ள சுவர், மேஜை, நாற்காலி போல தன்னையும் வரைந்து கொண்டு மறைந்து போய் விடுகிறார் போலின்.

வாழ்க்கை ஒரு புத்தகம்.... 

உதாரணத்திற்கு புத்தகக் கடையின் ரேக்கில் இருக்கும் புத்தகங்கள் போலவே உடலில் வரைந்து கொண்டு, பார்ப்பதற்கு புத்தகங்கள் போலவே நின்று கொள்கிறார்.

படிக்கட்டு மனிதர்... 

இதுபோலவே, காய்கறிக்கடை, படிக்கட்டுகள், சுவர்கள் எதுவாக இருந்தாலும் அது மாதிரியே தன் உடையில் வரைந்து ‘காணாமல்' போய் விடுகிறார் போலின்.

இன்னும் சில.... 

இதோ, உங்களுக்காக போலினின் மேலும் சில அற்புதப் படைப்புகள்.... இந்த சேர்களில் அவர் எங்கு உட்கார்ந்திருக்கிறார் என உங்களால் உடனடியாக அனுமானிக்க முடிகிறதா...

மரக்கட்டைகள் நடுவில்... 

மரக்கட்டைகளோடு மரக்கட்டையாக நின்று கொண்டிருக்கிறார் போலின். எப்படித்தான் மனுசர் அசராமல் லொகேஷன் மாத்துகிறாரோ....

இங்கே பாருங்கள்.... 

வண்டியோடு நின்று கொண்டிருக்கும் போலினை கண்டுபிடிப்பது கொஞ்சம் சிரமமான வேலை தான். இருந்தாலும் முயற்சி செய்து பாருங்களேன்....

ஆவி எல்லாம் இல்லீங்க.... 

இந்தப் புகைப்படத்தைப் பார்க்கும் போது, இந்தக் காவலர் ஏதோ ஆவியுடன் இருப்பது போன்ற மாயை ஏற்படுகிறதல்லாவா... அது போலின் தான்.

திகில் அனுபவம்.... 

திகில் படங்களில் பார்த்திருப்போமே, ஆங்காங்கே ஒரு நிழலுருவம் யார் கண்ணுக்கும் புலப்படாமல் உலா வருவது மாதிரி, அந்த மாதிரி போலின் நிற்கிறார் பாருங்கள்....

கண்ணை நம்பாதே... உன்னை ஏமாற்றும் 

இவரது பலப் புகைபடக்களைப் பார்க்கும் போது, என்னாமா யோசிச்சுருக்கான்யா மனுஷன்' என வியக்காமல் இருக்க முடியவில்லை. அந்தளவிற்கு கண்களை ஏமாற்றுகிறார் போலின்....

தேடித் தேடிப் பார்த்தேனே.... 

போலினின் சில படைப்புகளை பார்க்கும் போது, நன்றாக கண்ணைக் கசக்கிக் கொண்டு ‘உண்மையிலேயே அக்கு போலின் இருக்கிறாரா...' எனத் தேடித் தான் பார்க்க வேண்டி இருக்கிறது....

சூப்பர் போலின்.... 

போலினின் ஒவ்வொரு படைப்புகளுமே அவரது கடின உழைப்பை பறை சாற்றுவதாக அமைந்துள்ளது மறுக்க இயலாது....

கைண்ட் அண்டென்சன் ப்ளீஸ்.... 

மிஸ்டர் போலின், தயவு செஞ்சு எங்க ஊர்ப்பக்கம் வந்துடாதீங்க... உங்க உடம்புல ஏதாவது அரசியல் சின்னத்தை வரைந்து தேர்தல் பிரச்சாரத்துக்குப் பயன் படுத்த ஆரம்பிச்சிடுவாங்க... ஹி...ஹி...ஹி...

















'சிம்பன்சிக்கு சட்டரீதியான நபர் என்ற அந்தஸ்து தேவை'

'சிம்பன்சிக்கு சட்டரீதியான நபர் என்ற அந்தஸ்து தேவை'



சிம்பன்சி மனிதக் குரங்குகளை சட்ட ரீதியான ஆளாக அங்கீகரிக்க வேண்டும் என்று நியூயார்க் நீதிமன்றம் ஒன்றில் அமெரிக்க விலங்கு உரிமைக் குழு ஒன்று மனுத்தாக்கல் செய்துள்ளது.

மனிதரல்லாதோரின் உரிமைக்கான திட்டம் என்னும் பெயரைக் கொண்ட அந்த அமைப்பு ''டொமி'' என்னும் சிம்பன்சி ஒன்றுக்கு ''சட்ட ரீதியான ஆளந்தஸ்து'' கிடைக்க வேண்டும் என்றும்,அதன் மூலம் அது, ''உடலியல் சுயாதீனத்துக்கான அடிப்படை உரிமைகளைப் பெறும்'' என்றும் கூறுகிறது.

நியூயார்க்கில் வேறு இடங்களில் உள்ள மேலும் மூன்று மனிதக் குரங்குகளுக்காகவும் இதே மாதிரியான மனுவை தாக்கல் செய்ய அந்த அமைப்பு விரும்புகிறது.

இந்த நான்கு மனிதக் குரங்குகளும் அவை வைக்கப்பட்டிருக்கும் ஆய்வுக்கூடங்களில் இருந்து விடுவிக்கப்பட்டு, மனிதக் குரங்குகளுக்கான ஒரு சரணாலயத்தில் எஞ்சியிருக்கும் நாட்களைக் கழிக்கவேண்டும் என்றும் அந்த அமைப்பு கோருகின்றது.

அந்த மனிதக் குரங்குகள் சுயாதீனமானவை என்று நிரூபிக்கப்படும் பட்சத்தில் அவற்றுக்கு 'சட்ட ரீதியான ஆளந்தஸ்து கிடைத்துவிடும் என்று அந்த அமைப்பு கூறுகின்றது.

அந்தக் குரங்குகளுக்கு சுயநிர்ணயம், சுய விழிப்புணர்வு, தமது வாழ்க்கையை எப்படி வாழ்வது என்பதை தெரிவு செய்யும் வாய்ப்பு எல்லாம் இருக்க வேண்டும் என்று அவர்கள் வாதிடுகிறார்கள்.

இந்த வழக்கில் பொதுவாக சட்டவிரோதமாக மனிதர்கள் அடைத்துவைக்கப்படுவதற்கு எதிராக பிரயோகிக்கப்படும் 'ஹேபியஸ் கார்ப்பஸ்' (ஆட்கொணர்வு மனு ) என்ற பழங்கால உரிமையை இந்த அமைப்பு பயன்படுத்தியிருக்கிறது.

18ம் நூற்றாண்டில் இங்கிலாந்தில் தொடுக்கப்பட்ட அடிமை வர்த்தகத்துக்கு எதிரான வழக்குகளும் இதில் குறிப்பிடப்பட்டுள்ளன.

இந்த வழக்குக்கு ஆதாரமாக விஞ்ஞான ஆதாரங்களும் சமர்ப்பிக்கப்பட்டுள்ளன.

கடத்தப்பட்ட கதிரியக்கப் பொருளடங்கிய வாகனம் மீட்பு

கடத்தப்பட்ட கதிரியக்கப் பொருளடங்கிய வாகனம் மீட்பு


மெக்சிகோ சிட்டியில் செவ்வாய்க்கிழமையன்று கதிரியக்க பொருட்களைக் கொண்டு சென்று, கடத்தப்பட்ட ட்ரக் வண்டியைக் கைப்பற்றியுள்ளதாக மெக்சிகோ அதிகாரிகள் கூறுகின்றனர்.

கோபால்ட்-60 எனப்படும் அந்த கதிரியக்க பொருள் அதன் பாதுகப்பு கொள்கலனிலிருந்து வெளியே எடுக்கப்பட்டிருந்தது, ஆனால் அது அருகிலேயே இருந்தது என்றும் அவர்கள் கூறுகின்றனர்.

அதைத் திருடியவர்கள், உயிருக்கு ஆபத்தான அளவிலான கதிரியக்கத்துக்கு உள்ளாகியிருப்பதாகவும், ஆனால் சுற்றுப்புறப் பகுதியில் இருக்கும் மக்களின் உடல் நலத்திற்கு எந்த ஒரு ஆபத்தும் இல்லை என்றும் அதிகாரிகள் கூறுகின்றனர்.

புற்றுநோய்க்கு சிகிச்சை வழங்கும் கதிரியக்க சிகிச்சை இயந்திரம் ஒன்றை, வடக்கு நகரமான திஜுவானா என்ற ஊரின் மருத்துவமனையில் இருந்து, இந்த வாகனம் கொண்டு சென்றுகொண்டிருந்தது.

ஒரு பெட்ரோல் நிலயத்தில் தன்னை தாக்கி அந்த வாகனத்தை இரண்டு நபர்கள் எடுத்துச் சென்றதாக அதன் ஓட்டுனர் தெரிவித்துள்ளார். திருடியவர்களுக்கு அந்த வாகனத்தின் உள்ளே என்ன பொருட்கள் உள்ளதென்று தெரிந்திருக்காது என்றும் அந்த ஓட்டுனர் கூறினார்.

சர்வதேச சந்தையில் யூரோவை முறியடித்த சீனாவின் யுவான்!

சர்வதேச சந்தையில் யூரோவை முறியடித்த சீனாவின் யுவான்! 




உலகில் அதிகம் புழங்கப்படும் இரண்டாவது நாணயம் என்ற பெருமையை யூரோவிடமிருந்து தட்டிப் பறித்திருக்கிறது சீனாவின் யுவான். 

உலக சந்தையில் பயன்பாட்டு அளவில் இதுவரை யூரோதான் அதிக அளவு பயன்பாட்டில் இருந்தது. அதன் சந்தை பங்களிப்பு 6.64 சதவீதமாகும். 

ஆனால் இதனை முறியடிக்கும் வகையில் சந்தைப் பயன்பாட்டில் 8.66 சதவீதம் எனும் அளவுக்கு யுவான் அல்லது ரென்மின்பி (RMB)யின் சந்தைப் பயன்பாடு அதிகரித்துள்ளது. 

இதனை சர்வதேச இன்டர்பேங்க் பைனான்சியல் டெலிகம்யூனிகேஷன்ஸின் அறிக்கை உறுதிப்படுத்தியுள்ளது.

உலகளாவிய வர்த்தகத்தை தீர்மானிப்பது இன்றைக்கும் அமெரிக்க டாலர்தான். அதன் சர்வதேச பங்களிப்பு 81.08 சதவீதமாகும். 

இப்போதைய நிலவரப்படி, சீனாவின் யுவான்தான் சர்வதேச அளவில் அதிகப் புழக்கத்தில் உள்ள ஆசிய நாணயமாகும். 

சீனா, ஹாங்காங், சிங்கப்பூர், ஜெர்மனி மற்றும் ஆஸ்திரேலியா ஆகிய நாடுகள் அதிக அளவில் யுவானைப் புழக்கத்தில் வைத்துள்ளன. பாகிஸ்தானிலும் யுவான் அதிகம் புழங்குவது குறிப்பிடத்தக்கது. வரும் நாட்களில் இலங்கையும் இந்தப் பட்டியலில் இடம்பெறக் கூடும்!

 டாலருக்கு நெருக்கடி தரும் அளவுக்கு சர்வதேச பொருளாதாரத்தில் யுவானின் பங்களிப்பை அதிகரிக்கும் வேலையில் தீவிரமாக உள்ளது உலகின் இரண்டாவது பொருளாதார வல்லரசான சீனா.


தி அப்சர்வர்: இன்று உலகின் முதல் ஞாயிறு செய்தித்தாளின் பிறந்த நாள்...

தி அப்சர்வர்: இன்று உலகின் முதல் ஞாயிறு செய்தித்தாளின் பிறந்த நாள்... 



கிட்டத்தட்ட 222 ஆண்டுகளுக்கு முன்பு இன்று தான் உலகின் முதல் ஞாயிறு செய்தித்தாள் வெளியிடப்பட்டது. 

தி அப்சர்வர் என்ற பெயரில், 1791 டிசம்பர் 4ம் தேதி தான் முதல் ஞாயிரு செய்தித்தாள் இங்கிலாந்தில் வெளியிடப்பட்டது. ஆரம்பத்தில் அரசு மானியத்துடன் வெளிவந்த இந்த செய்தித்தாளை டபிள்யூ.எஸ்.போர்ன் என்பவர் வெளியிட்டார்.

16 ஆசிரியர்கள்.... 

எபிள்யூ.எஸ்.போர்ன்க்குப் பிறகு கிட்டத்தட்ட எட்டு பேரிடம் கைமாறிய ‘தி அப்சர்வர்' செய்தித்தாளில், இதுவரை 16 பேர் ஆசிரியர்களாக இருந்துள்ளனர்.

இரண்டு நூற்றாண்டுகள்.... 

222 வருடங்களாக வெளியாகும் அப்சர்வர் தற்போது 2லட்சத்து 16 ஆயிரம் பிரதிகள் வரை விற்பனையாகிறது. கால ஓட்டத்திற்கேற்ப அதன் வளர்ச்சியும் வேறுபட்டது.

மறுப்பு.... 

உளவாளி என குற்றம்சாட்டப்பட்டு, பர்சாத் பசோப்ட் எனும் அப்சர்வரின் செய்தியாளர் 1990ல் ஈராக்கில் தூக்கில் போடப்பட்டார். பிறகு அது தவறான தகவல் என மறுப்புத் தெரிவிக்கப்பட்டது.

இணையத்தில்.... 

2005ல் இணைய உலகில் அடியெடுத்து வைத்த அப்சர்வர், பத்திரிகையின் உள்நிர்வாகத்தில் எடுக்கப்பட்ட முடிவுகளை மக்களுக்கு பகிரங்கப்படுத்துகிற பழக்கத்தை மக்களிடம் தொடங்கி வைத்தது.

எகிப்தில் தடை.... 

2008ல் முகமது நபி பற்றிய கார்ட்டூன்களை வெளியிட்டதால் எகிப்தில் அப்சர்வர் தடைசெய்யப்பட்டது குறிப்பிடத்தக்கது.


தி கார்டியன்... 

தி அப்சர்வரின் சகோதர பத்திரிகையாக தி கார்டியன் எனும் புகழ்பெற்ற நாளிதழ் வெளியாகிறது.

நியூஸ் ரூம்.... 

தங்களின் அனைத்து ஆவணங்களும் மக்களுக்கு கிடைக்கும் வகையில் லண்டன் நகரில் நியூஸ் ரூம் என்ற மையத்தை அப்சர்வரும் கார்டியனும் இணைந்து நடத்துகின்றன.

இணைய ஆவண வசதி.... 

1791 முதல் 2003 வரை அப்சர்வரின் பழைய பத்திரிகைகள் இணைய தளத்திலும் கிடைக்கும் வசதியை 2007ல் அறிமுகப் படுத்தியது அப்சர்வர்.


கமராவை தூக்கி சென்ற கழுகு! 110 கி.மீ. படம் பிடித்த அதிசயம்!

கமராவை தூக்கி சென்ற கழுகு! 110 கி.மீ. படம் பிடித்த அதிசயம்!



அவுஸ்திரேலியாவில் முதலைகளை கண்காணிக்க வைத்திருந்த கமராவை கழுகு ஒன்று தூக்கி சென்று 110 கி.மீ. தூரத்தில் வீசியுள்ளது. கமரா செயற்பாட்டில் இருந்ததால் கழுகு பறந்த 110 கி.மீ. தூரமும் அதில் பதிவாகி இருப்பது அதிசயத்தை ஏற்படுத்தியுள்ளது.

அவுஸ்திரேலியாவில் வன பாதுகாவலர்கள் மே என்ற பகுதியில் மார்க்கரெட் ஆற்று பகுதியில் முதலைகளை கணக்கிடுவதற்காக சென்சார் பொருத்தப்பட்ட கமராவை வைத்திருந்தனர். 

இந்த கேமரா 10 முதல் 15 செ.மீ. நீளமும், 5 செ.மீ. அகலமும் கொண்டது. இது நீரில் விழுந்தாலும் பாதிக்காமல் இயங்க கூடியது என்பது குறிப்பிடத்தக்கது.

Wednesday, December 4, 2013

‘தேங்க்ஸ் கிவ்விங் டே’ அன்று இறைவனடி சேர்ந்த உலகின் அசிங்கமான நாய் ‘எல்வுட்’

‘தேங்க்ஸ் கிவ்விங் டே’ அன்று இறைவனடி சேர்ந்த உலகின் அசிங்கமான நாய் ‘எல்வுட்’



அழகான பொருட்கள் தான் இனிமையான நினைவுகளில் நிற்கும் என்றில்லை. சில சமயங்களில் இதற்கு நேர் மாறாகவும் நடப்பதுண்டு. இறைவன் படைப்பில் ஒவ்வொரு பொருளுக்குமே அதற்கென்று தனிச்சிறப்பு உண்டு. 

அந்தவகையில், உலகின் மோசமான அழகற்ற நாய் என்ற சிறப்புப் பட்டத்தைப் பெற்ற அமெரிக்க நாயான எல்வுட், கடந்த வாரம் மரணமடைந்துள்ளது. அமெரிக்காவே தேங்க்ஸ் கிவ்விங் டேயை விமரிசையாகக் கொண்டாடிக் கொண்டிருக்க, எல்வுட்டின் மரணத்தால் அதன் ரசிகர்கள் மட்டும் சோகத்தில் மூழ்கிப் போயினர்.

எல்வுட்.... 

அமெரிக்காவின் நியூஜெர்ஸி யைச் சேர்ந்த கரேன் குவிக்லிக்கு சொந்தமான நாய் எல்வுட். இந்த நாய், சைனீஸ் கிரெஸ்டட், சிகுவாகுவா ஆகிய நாய் இனங்களின் கலப்பினம்.


அழகற்ற நாய் பட்டம்... 

கடந்த 2007-ம் ஆண்டு கலிபோர்னியாவில் நடைபெற்ற உலகின் மிகவும் அழகற்ற நாய் என்ற போட்டியில் பங்கேற்ற எல்வுட், மிக எளிதாக பட்டத்தைத் தட்டிச் சென்றது.

வித்தியாசமான முகம்... 

எப்போதும் நாக்கைத் தொங்கப் போட்டுக் கொண்டிருக்கும் எல்வுட், சற்று மூடிய கண்களுடனும், தலையில் விசித்திரமான வெள்ளை முடிக் கற்றைகளுடன் மிகவும் வித்தியாசமாக இருந்ததே அது பலரையும் ஈர்க்க முக்கியக் காரணமாக அமைந்தது.

ரசிகர் பட்டாளம்.... 

பட்டத்தை வென்ற எல்வுட்டின் புகழ், அமெரிக்கா மட்டுமின்றி பிரேஸில், ஜெர்மனி உள்ளிட்ட நாடுகளிலும் பரவத் தொடங்கியது. எல்வுட்டின் ரசிகர்கள் வட்டம் உலக அளவில் அதிகரித்தது.


திடீர் மரணம்.... 

இந்த உலகில் அழகற்றது என்று எதுவுமே இல்லை. ஒவ்வொரு உயிரினமும் அதற்குரிய லட்சணங்களுடனும் தனித்தன்மையுடனும் அழகாகப் படைக்கப் பட்டிருக்கிறது என்ற கூற்றுக்கு உதாரணமாக திகழ்ந்த எல்வுட், எதிர்பாராத விதமாக கடந்த வாரம் தனது 8வது வயதில் மரணமடைந்தது.

எவ்ரி ஒன் லவ்ஸ் எல்வுட்.... 

தனது நாய் எல்வுட்டை மிகவும் நேசித்த அதன் உரிமையாளர் குவிக்லி, ‘எவ்ரி ஒன் லவ்ஸ் எல்வுட்' என்ற தலைப்பில் குழந்தை களுக்கான புத்தகம் ஒன்றை எழுதியுள்ளார்.

குறுகிய காலத்தில்.... 

தனது செல்ல நாயான எல்வுட் குறித்து குவிக்லி நினைவு கூறியதாவது, ‘மிகவும் சிறிய நாயான எல்வுட், தான் வாழ்ந்த குறுகிய காலத்திலேயே பலரின் அபிமானத்தைப் பெற்றுள்ளது. எல்வுட்டை நேரில் பார்க்காதவர்கள் கூட, அதன் மீது அன்பு செலுத்தியது நெகிழ்ச்சியாக உள்ளது. கடந்த வாரம் வியாழக்கிழமை (நவம்பர் 28) தேங்ஸ் கிவ்விங் டே (அறுவடைத் திருநாள்) அன்று திடீரென நோய்வாய்ப்பட்டு எல்வுட் உயிரிழந்தது. இறப்புக்கான காரணம் தெரியவில்லை" எனத் தெரிவித்துள்ளார்.


Tuesday, December 3, 2013

மனைவிக்கு 15 நாள், லிவ் இன் பார்ட்னருக்கு 15... ஆளுக்கு ஒரு ரூம்.. லோக் அதாலத் அதிரடி தீர்ப்பு!

மனைவிக்கு 15 நாள், லிவ் இன் பார்ட்னருக்கு 15... ஆளுக்கு ஒரு ரூம்.. லோக் அதாலத் அதிரடி தீர்ப்பு!



ம.பி.: மனைவிக்கு 15 நாளும், லிவ் இன் பார்ட்னருக்கு 15 நாள் என்றும் ஒதுக்கி இருவரையும் சம அளவில் பாவிக்குமாறு மத்தியப் பிரதேச மாநிலலத்தைச் சேர்ந்த ஒருவருக்கு அங்குள்ள லோக் அதாலத் கோர்ட் அறிவுரை கூறியது சலசலப்பையும் விவாதத்தையும் ஏற்படுத்தியுள்ளது.

லிவ் இன் உறவுகளில் தவறில்லை, அதை 8 நெறிமுறைகளுடன் கடைப்பிடிக்குமாறு உச்சநீதிமன்றம் உத்தரவிட்ட நிலையில் மத்தியப் பிரதேசத்தில் ஒரு வினோதமான வழக்கில் வித்தியாசமான தீர்ப்பை அளித்துள்ளது லோக் அதாலத் நீதிமன்றம்

மனைவி, மற்றும் லிவ் இன் பார்ட்னருடன் வசிக்கும் ஒரு நபரை, இருவரையும் சமமாக பாவிக்குமாறும், சமமாக நேரம் ஒதுக்கிக் கவனிக்குமாறும் அறிவுறுத்தியுள்ளது அந்த லோக் அதாலத்.

காதலிக்கு அதிக நேரம்.. மனைவிக்கு ஓர வஞ்சனை

இந்த நிலையில், மனைவியை விட அதிக நேரம் காதலிக்கு ஒதுக்கி வந்தாராம் இந்த ரிடையர்ட் ஆசாமி. மேலும் காதலியை தனது வீட்டுக்கே கூட்டி வந்து விட்டார்.

லோக் அதாலத்துக்குப் போன மனைவி

இதனால் அதிர்ச்சி அடைந்த மனைவி லோக் அதாலத்தில் வழக்குப் போட்டார். தன்னிடம் பாரபட்சமாகவும், காதலியிடம் அதிக பாசம் காட்டியும் கணவர் நடந்து கொள்வதாக அவர் முறையிட்டார்.

லோக் அதாலத்தின் அட்டகாச தீர்ப்பு

இந்த வழக்கை நீதிபதி கங்கா சரண் துபே விசாரித்தார். பின்னர் அவர் அதிரடியான உத்தரவைப் பிறப்பித்தார். அவரது தீர்ப்பைப் பாருங்கள்...

ஒரே வீட்டில் வசிக்கலாம்

மனைவியும், காதலியும் ஒரே வீட்டில் வசிக்கலாம்.

ஆளுக்கு 15 நாள்

ஒரு மாதத்தில் மனைவிக்கு 15 நாட்களையும், காதலிக்கு 15 நாட்களையும் பிரதிவாதி ஒதுக்க வேண்டும்.

ஆளுக்கு ஒரு ரூம்

பிரதிவாதியின் வீட்டில் மொத்தம் 3 அறைகள் உள்ளதாக தெரிவிக்கப்பட்டுள்ளது. அதில் மனைவிக்கு ஒரு அறை, காதலிக்கு ஒரு அறை என ஒதுக்கித் தங்கிக் கொள்ள வேண்டும். நடுவில் உள்ள அறை பிரதிவாதிக்கானது. அதில் அவர் தங்கிக் கொள்ளலாம்.

நடுரூமிலிருந்து ரெண்டு ரூமுக்கும் கதவு வைங்க..

இந்த நடு ரூமிலிருந்து மனைவியின் ரூமுக்கும், காதலியின் ரூமுக்கும் போய் வருவதற்கு வசதியாக கதவு வைத்துக் கொள்ள வேண்டும்.

மனைவிக்கும், காதலிக்கும் சம பங்கு

பிரதிவாதியின் அசையும், அசையா சொத்துக்களில் அவரது மனைவிக்கும், காதலிக்கும் சம பங்கு உண்டு... இதுதான் நீதிபதியின் தீர்ப்பாகும்.

பிப்ரவரி மாதம் எப்படி... ??!!!

இந்தத் தீர்ப்பில் 29 நாட்கள் வரும் பிப்ரவரி மாதத்தில் பிரதிவாதி எப்படி பிரித்துக் கொள்ள வேண்டும், 31 நாட்கள் வரும் மாதங்களில் அவர் எப்படி நாள் ஒதுக்கீடு செய்ய வேண்டும் என்பது குறித்து தெரிவிக்கவில்லை.

நிலவின் சுற்றுவட்ட பாதையை கடந்தது மங்கல்யான்

நிலவின் சுற்றுவட்ட பாதையை கடந்தது மங்கல்யான்



செவ்வாய் கிரகத்தை ஆய்வு செய்வதற்காக ரூ.450 கோடி செலவில் உருவாக்கப்பட்ட மங்கல்யான் விண்கலம் பி.எஸ்.எல்.வி சி-25 ராக்கெட் மூலம் கடந்த மாதம் 5ம் தேதி விண்ணில் செலுத்தப்பட்டது. பூமியை சுற்றிக் கொண்டிருந்த மங்கல்யான் விண்கலம், நேற்று முன்தினம் அதிகாலை 12.49 மணியளவில் புவி சுற்றுவட்ட பாதையில் இருந்து வெற்றிகரமாக விலக்கப்பட்டது. மங்கல்யான் விண்கலத்தில் பொருத்தப்பட்டுள்ள நியூட்டன் திரவ இன்ஜின் சுமார் 20 நிமிடங்கள் இயக்கப்பட்டு,  விண்கலத்தை புவி சுற்றுவட்டபாதையிலிருந்து விலக்கி செவ்வாய் கிரகத்தை நோக்கி செல்ல வைக்கும் ‘டிரான்ஸ் மார்ஸ் இன்ஜெக்ஷன்’ என்ற சிக்கலான பணியை இஸ்ரோ விஞ்ஞானிகள் வெற்றிகரமாக செய்தனர். 

செவ்வாய் கிரகத்தை நோக்கிய 300 நாள் பயணத்தை மங்கல்யான் நேற்று முன்தினம் வெற்றிகரமாக தொடங்கியது. தற்போது நிலவின் சுற்றுவட்டப்பாதையையும் கடந்து மங்கல்யான் சென்று கொண்டிருக்கிறது. ஒரு நாளைக்கு 10 லட்சம் கி.மீ தூரம் மங்கல்யான் பயணிக்கிறது. இந்திய விண்கலம் நிலவின் சுற்றுவட்டபாதையை கடந்து விண்வெளியின் வெகு தூரத்தில் பயணிப்பது இதுவே முதல் முறை. மங்கல்யான் பயணத்தை பெங்களூரில் உள்ள இஸ்ரோ கட்டுப்பாட்டு மையம் தொடர்ந்து கண்காணித்து வருகிறது. 

Monday, December 2, 2013

ஏர்பஸ் மிலிடரி A400M ராணுவ விமானத்தின் கன்னிப் பயணமும், கடைசிப் பயணமும்!

ஏர்பஸ் மிலிடரி A400M ராணுவ விமானத்தின் கன்னிப் பயணமும், கடைசிப் பயணமும்!



 
ஐரோப்பிய விமான தயாரிப்பு நிறுவனம் ஏர்பஸ்ஸின் ராணுவ பிரிவான ‘ஏர்பஸ்-மிலிடரி’ (‘Airbus Military’), தமது முக்கிய விமானம் ஒன்று ஓய்வு பெறுவதை அறிவித்துள்ளது. ஏர்பஸ் மிலிடரி A400M ராணுவ விமானம் 1-வது தடவை கன்னிப் பயணமாக வானில் பறந்த தேதியில் இருந்து சுமார் 4 வருடங்களின் பின், தனது இறுதி பயணத்தை முடித்து தரையிறங்கியது.

கன்னிப் பயணத்தின்போது அந்த விமானத்தை இயக்கிய அதே விமானிகள் மற்றும் பிளைட் எஞ்சினியர்கள்தான், இறுதி பிளைட்டையும் இயக்கினர் 



விமானம் அறிமுகப்படுத்தப்பட்டு 4 ஆண்டுகளில் ஓய்வு பெறுகிறது என நாம் எழுதியதால், விமானத்தில் ஆயுள் காலமே அவ்வளவுதானா என்ற கேள்வி உங்களுக்கு எழலாம். இதை அப்படி பார்க்க கூடாது.






எந்தவொரு புதிய மாடல் விமானத்தை டிசைன் செய்யும்போதும், தயாரிக்கப்படும் 1-வது விமானம் விற்பனைக்காக தயாரிக்கப்படுவதில்லை. தயாரிக்கப்படும் 1-வது விமானத்தை Development aircraft என்பார்கள். ஏர்பஸ் மிலிடரி A400M ராணுவ விமானத்தின் 1-வது விமானம், MSN1, இந்த விமானத்தை அடுத்த அடுத்த கட்ட தயாரிப்புகளில் எப்படி மேம்படுத்தலாம் என்பதற்கான பரிசோதனைகளை செய்ய தயாரிக்கப்பட்டது.

புதிய மாடல் விமானம் ஒன்றை தயாரிக்க தொடங்கியபின், சிறிது சிறிதாக அதன் இயங்குதிறனை டெவலப் செய்வது, 1-வது விமானத்தை தொடர்ந்து பறக்க வைத்து பார்ப்பதன் மூலம்தான். புதிதாக மாற்றம் எதையாவது செய்து, 1-வது விமானத்தில் பொருத்தி பறந்து பார்த்தே, அது சரியாக உள்ளதா என்று செக்கிங் செய்வார்கள்.

அப்படி தயாரிக்கப்பட்ட 1-வது விமானம்தான், தற்போது ஓய்வு பெற்றுள்ளது. இதை, கண்காட்சிச்சாலை ஒன்றில் காட்சிக்கு வைப்பது என ஏர்பஸ் நிறுவனம் முடிவு செய்துள்ளது.



ஒரு விமானத்தின் புதிய மாடல் டிசைன் பண்ணப்படுவது, தயாரிக்கப்படுவது, அறிமுகப்படுத்தப் படுவது, அப்கிரேட் செய்வது, கஸ்டமர்களை வசப்படுத்துவது என ஒவ்வொரு ஸ்டெப்புமே, மிகவும் சுவாரசியமானவை. இதற்காகவே மில்லியன் கணக்கில் செலவிடுவார்கள். சுவாரசியமான இந்த ஸ்டெப்ஸ்களை, நாம் கொடுத்துள்ள போட்டோக்களில் பார்க்க போகிறீர்கள்.

ஏர்பஸ் மிலிடரி A400M ராணுவ விமானம், புதிய தலைமுறை விமானமாக பல நாடுகளின் விமானப்படைகளால் கருதப்படுகிறது. இந்த ரக விமானத்தின் முதலாவது கஸ்டமர், பிரான்ஸ் நாட்டு விமானப்படை.

ராணுவத்துக்காக தயாரிக்கப்படுகிறது என்பதால், இது ஒரு போர் விமானமல்ல. ராணுவ போக்குவரத்து விமானம். துருப்புக்களையும், ராணுவ தளவாடங்களையும் கொண்டுசெல்ல பயன்படுத்தப்படும் விமானம்.


ஏர்பஸ் மிலிடரி A400M ராணுவ விமானத்தின் மற்றொரு சிறப்பம்சம், இதை டேங்கள் விமானமாகவும் மாற்ற முடியும். அதாவது, வானில் வைத்து மற்றைய விமானங்களுக்கு எரிபொருள் நிரப்பும் விமானமாக இதை பயன்படுத்த முடியும். பொதுவாக அப்படியான பணிக்கு பயன்படுத்தப்படும் விமானம், வேகமாகவும், அதே நேரத்தில் மெதுவாகவும் பறக்கக்கூடிய விமானமாகவும் இருக்க வேண்டும்.

அத்துடன், அளவில் பெரிய அந்த விமானம், செங்குத்தாக மேலெழ கூடிய திறன் கொண்டதாகவும் இருக்க வேண்டும் (14-வது போட்டோவை பார்க்கவும். இந்த சைஸ் விமானங்கள் இப்படி பறப்பதை லேசில் பார்க்க முடியாது).

நம்ம பவர் ஸ்டார் படம் வெளியானாலே முதல்நாள் ஹீரோ கட்-அவுட்டுக்கு பாலாபிஷேகம் செய்வதை லோக்கல் தியேட்டர் வாசல்களில் பார்த்திருப்பீர்கள். பவர் ஸ்டாருக்கே பால் அபிஷேகம் செய்வதை பார்த்த கண்களால், பிளேனுக்கு அபிஷேகம் செய்வதை பார்த்திருக்கிறீர்களா?

அதுவும் பால் அல்ல, ஷம்பெயின் அபிஷேகம்!