Wednesday, September 12, 2012

30 யூரோவில் பூமியை படம் பிடித்து சாதனை படைத்த வாலிபர்


30 யூரோவில் பூமியை படம் பிடித்து சாதனை படைத்த வாலிபர்





பல நூறு கோடி ரூபாய் செலவில் செயற்கை கோளை விண்ணில் செலுத்தி அமெரிக்காவின் நாசா விஞ்ஞானிகள் பூமிப் பந்தை விதம் விதமாய் படம் எடுத்து வருகின்றனர்.
ஆனால் பழைய கமெரா உயரமாக செல்லக் கூடிய ஒரு பலூன் என்று வெறும் 200 யூரோ செலவில் இச்சாதனையை பிரிட்டனை சேர்ந்த இளைஞர் நிகழ்த்திக் காட்டியிருக்கிறார், .

பிரிட்டனின் வோர்செஸ்டர் பகுதியில் உள்ள ஒம்பர்ஸ்லி நகரைச் சேர்ந்தவர் ஆடம் கட்வொர்த் (வயது 19).

பொறியியல் படிப்பில் ஆரம்பக் கட்டத்தை தாண்டாத இவர், இரண்டு ஆண்டுகளுக்கு முன்பு கமெராவை பலூனில் வைத்து பறக்க வைக்கும் முயற்சியில் ஒருவர் ஈடுபட்டதை பார்த்திருந்தார்.

அந்த சம்பவத்தை கடந்த சில நாட்களாக நினைத்து வந்த ஆடம், அதையே சாதித்து காட்ட வேண்டும் என்று எண்ணி பழைய பொருட்கள் விற்கும் கடைக்கு சென்று 30 யூரோ மதிப்பில் ஒரு கமெராவை வாங்கினார்.

பின்பு கார்களில் பயன்படுத்தப்படும், ஜி.பி.எஸ் கண்காணிப்பு கருவியையும், அதன் மூலம் சிக்னல்களை அனுப்பும் ரேடியோ டிரான்ஸ்மிட்டர் கருவியையும், மைக்ரோ பிராசசர் கருவியையும் வாங்கினார்.

பின்பு இரண்டு மீற்றர் நீளம் கொண்ட, 30 கி.மீ., உயரத்தை தாண்டி, பறக்கக் கூடிய வலிமையான ரப்பர் பொருளால் ஆன பலூனையும், சூரிய ஒளியை மின்சக்தி ஆக்கும் சோலார் பேனல்களையும் தேடிப் பிடித்து வாங்கினார்.

அனைத்தையும் ஒன்றாக இணைத்து 40 மணி நேர கடும் உழைப்புக்கு பின்பு புதியதோர் சாதனத்தை உருவாக்கி பின்பு அதை பலூனில் பாதுகாப்பாக பொருத்தினார்.

எல்லாம் முடிந்த பின்பு பலூனை விண்ணில் செலுத்தினார். இரண்டரை மணி நேரமாக பறந்த பலூன் பூமியிலிருந்து, 33 கி.மீ., உயரத்தை சென்றடைந்தது. அங்கிருந்தவாறே பூமிப் பந்தை பல கோணங்களில் கமெராக்கள் படம் எடுத்தன.

அதன் பின்பு சிறிது நேரத்தில் பலூன் வெடித்து சிதறியது. கமெராக்கள் கொண்ட பெட்டி, பூமியை நோக்கி மணிக்கு, 250 கி.மீ., வேகத்தில் பாய்ந்து வந்து விழுந்தது.

ஜி.பி.எஸ்., கருவியின் துணையுடன் ரேடியோ டிரான்ஸ்மிட்டர் அனுப்பிய சிக்னல்களை கொண்டு தன் வீட்டிலிருந்து, 45 கி.மீ., தொலைவில் பிராட்வே என்ற இடத்தில் விழுந்து கிடந்த கமெரா பெட்டியை எடுத்து, அதில் இருந்த படங்களை பார்த்தார் ஆடம்.

நம்ப முடியாத வகையில், அக்கமெராவில் பூமியை பல்வேறு கோணங்களில் எடுக்கப்பட்ட படங்கள் பதிவாகி இருந்தன.

நாசா விஞ்ஞானிகள் வெளியிட்ட பூமி படங்களுக்கு ஆடம் கேமரா எடுத்த படங்கள் எந்த வகையிலும் குறைவில்லாத வகையில் இருந்தன.